Ish-kryeministri i Kosovës dhe ish-kryetari i Prishtinës, Isa Mustafa ka reaguar pas lajmit se në këtë fillimvit do të vendosen kamerat e sigurisë në kryeqytet.

“Në vitin 2012 edhe unë dhe bashkëpunëtorët e mi punonim të instalonim kamera në vendet më të frekuentuara të Prishtinës dhe në udhëkryqe. Në ndërkohë me dy bashkëpunëtorë shkova në vizitë në një shtet jo-evropian, i cili ishte dhe është nën tensionin e rrezikut të jashtëm dhe të sigurisë. Na u demonstruan edhe vëzhgimet me kamera në një port të tyre. Për ta veprim i nevojshëm. Por ata nuk i konsideronin problem qytetarët e tyre por agresionin nga jashtë”, ka shkruar Mustafa.

Ai ka thënë se nuk i’u ka dukur që Prishtina ka arsye që t’i vendosë këto kamera.

“Kur u ktheva ua kumtova bashkëpunëtorëve të mi se ne nuk duhet të bëjmë këtë, sepse nuk kemi të drejtë të mbikëqyrim çdo lëvizje të këmbëve e duarve, hundës e buzëve, e se kush me kënd gjendet në makinë… çdo përshëndetje të burrave e grave, të vajzave e të djemve, sepse mund tu krijojmë probleme, pa e bërë ata asnjë faj”, ka shkruar ai.

Tutje, ai ka shtuar se nuk pajtohet që të vëzhgohet nga kamerat me shkopin e tij, sepse sipas tij, atë e mban për arsye shëndetësore e jo që ta cenoj askënd./Arbresh.info